دورة ابتعاث أرامكو (CPP)

السلام عليكم ورحمة الله وبركاته، أنا يوسف، أحد المقبولين في برنامج ابتعاث أرامكو، وحاب أشارك تجربتي باختصار.

أول ما عرفت عن اختبار أرامكو بدأت أدور مصدر يناسبني لكن اللي لاحظته إنه واجد مصادر كانت غالية. لما شفت دورة فارس أعجبني أسلوبه وسعر الدورة مناسبني، وقررت أركز على مصدر واحد بدل ما أضيع وقتي بين تجميعات ومصادر كثيرة. اشتركت في دورة فارس والحمدلله ما ندمت أبدًا، واخترت أذاكر فقط قسم الرياضيات، لأني ما كنت محتاج أذاكر إنجليزي بما إن مستواي متقدم، لكن واضح إنه قسم الانجليزي في الدورة كان ممتاز.

اللي أعجبني في الدورة إن الأسئلة مو سهلة، تتحدى تفكيرك، وتجهزك فعلًا للاختبار. بعد كل درس كنت أحل الأسئلة مباشرة، وإذا فيه شي ما فهمته أرجع للشرح وأكرر لين أستوعب. طريقة فارس تضمن إنك ما تحفظ، بل تفهم وتتعلم كيف تحل وهذا اللي تبغاه للاختبار.

بصراحة، أسئلة الرياضيات في اختبار أرامكو كانت مشابهة اللي تدربت عليه. كان فيها أفكار جديدة صحيح لكنها ما طلعت عن دورة فارس، خاصة إنه اختبار الدفعة اللي أنا فيها كان متغير في قسم الرياضيات، لكن عرفت أحل أغلب الأسئلة بسهولة لأني تدربت على أسئلة واجد، وبعضها نسخ لصق من تمارين الدورة. وهذا فرق معي كثير، ما حسيت بغرابة أو مفاجآت وقت الاختبار.

أنصح أي شخص جاد بالدورة، بشرط يحل التمارين بجد، لأنه الاكتفاء بالتأسيس فقط ما يكفي لأنه أرامكو يجيبوا أفكار جديدة كل سنة. ضروري التدريب على أكبر كم من الأسئلة اللي تقدر عليه والتعب ما يضيع إن شاء الله. والحمدلله، انقبلت. والجيات أكثر إن شاء الله.

السلام عليكم و رحمة الله و بركاته، اخوكم هاشم احد المقبولين و لله الحمد، و بعد الله و توفيقه دورة فارس هي الي ساعدتني اني أوصل لهدفي و الحمدلله

طبعاً، دام انك قاعد تقرأ التجارب فكذا اعرف انك حريص و حاب تختار الأفضل بين الخيارات الموجودة. أنا حاب أطمنك ان دورة فارس ماشاءالله تبارك الله كافية و بزيادة. الصراحة تتميز فيها بالترتيب و التنسيق الي يخلي الأفكار تتسهل ان شاء الله. غير عن الاختبارات المحاكية و قروب الدعم إلى اخره، و ميزة ثانية هي خاصية البوت... ارهب خاصية بدون مبالغة، هذا و هي لسا كانت قيد التطوير و لكن مفيدة مفيدة مفيدة جدا خلتني اعرف نقاط ضعفي و اركز على ايش و اقلل من ايش. التجميعات طبعا افضل و احدث التجميعات، تغطي الأفكار اللي جاتني فالاختبار.

في نهاية المطاف حاب اقول ان الدورة اختيار ممتاز للي حاب يوصل لهدفه الأكاديمي. و بإذن الله نشوفكم معنا فالدفعات الجاية.

السلام عليكم ورحمة الله، حبيت أشارك تجربتي مع الدورة اللي فعلًا كانت نقطة تحول بالنسبة لي في الاستعداد لاختبار أرامكو.

أنا من النوع اللي يحب يرتب وقته ويذاكر بس أحيانًا ما أعرف من وين أبدأ أو كيف أوصل للمعلومة بشكل سريع وفعّال، وهنا كانت فايدة الدورة.

المحتوى كان جدًا مرتب، والشرح واضح ومباشر، ما فيه لف ودوران، وفوق كذا الأسئلة كانت تغطي كل الأفكار اللي ممكن تجي، وهذا ساعدني أكتشف أخطائي وأعدلها من بدري.

الشي اللي أعجبني أكثر إنك مو بس تشرح وتخلص، لا، كنت متواجد للرد على أي استفسار أو توضيح، وهذا فرق معي كثير، خلاني أحس إني مو لحالي.

الحمد لله جبت درجة حلوة وانقبلت، وكل هذا بفضل الله ثم بفضل الدورة اللي فعلًا علمتني كيف أذاكر بذكاء مو بس بتعب.

أنصح فيها أي أحد ناوي يختبر، لأنها بتختصر عليه وقت وجهد كبير. يعطيك العافية وما قصرت أبدًا، والله يجزاك خير على تعبك معنا

انا محمد مقبول CPP دفعة العام وانا كنت اعاني من الرياضيات بشكل عام خاصة الدوال المثلثية ودروس الرياضيات اللي لها بعلاقة باختبار ارامكو

وكنت مستثقل الدراسة لانه صعبة بالنسبالي و لانه كان الوقت جدا ضيق جدا خاصة انه كان عندي اختبارات والتحصيلي واختبار الcpp بس الحمدلله اني دخلت عند دورة فارس ومشيت على جدول شهر اللي حاطه لنا

وصراحة مع الدورة الرياضيات صارت سهلة الحمدلله. كنت احل الاسئلة اللي حاطها وتابعت الدروس كاملة والحمدلله اختبرت وطلعت من الاختبار وانا مطمن من اجوبتي. وفي النهاية انقبلت في ابتعاث أرامكو ولله الحمد. الحين انا في التحضيري ولولا الله ثم دورة فارس ما انقبلت.

الحمدلله أولا، كانت لحظة قبولي في البرنامج من أجمل اللحظات، شعور الإنجاز اللي ما راح هدر كان لا يوصف. بدايتي كانت بسيطة جدًا. ما كنت شايلة هم الانجليزي (لأنه كان عندي خلفية من أول) قد ما كنت شايلة هم الرياضيات، فقررت أبدأ أتدرب من بدري.

سجلت في دورة تدريب فارس وكانت من أفضل القرارات اللي أخذتها. خلال هذه الفترة كنت أحل رياضيات مره كثير ولو في فكرة وقفت عندها كنت أرجع وأراجع فيديوهات حل الأسئلة. الصراحة يمكن أهم شي كان الاستمرارية في التدريب والحل.

ولما جت رسالة القبول كانت لحظة غير متوقعة.

أتمنى أي شخص يفكر يقدم على برنامج ابتعاث أرامكو ياخذ الخطوة بجدية. وتذكروا أنه الموضوع مو مستحيل ولكن يحتاج شوية سعي من جهتكم. وآخرًا، الله يكتبلكم اللي فيه الخير وبالتوفيق للجميع.

اولاً أنا كنت من بداية مسيرتي في الثانوي وانا اطمح للابتعاث فا لما سمعت عن برنامج أرامكو تحمست على التقديم.

علمتني وحده من صديقاتي عن دورة فارس و نصحتني فيها و على طول بنفس اليوم سجلت و بديت دراسة، ولكن مع الأسف ان ما بديت مذاكره إلا قبل الاختبار بشهر، ولكن اتّبعت جدول فارس الشهري مع تعديل بسيط.

اكثر شي ركزت عليه كان الرياضيات لاني اشتغلت على الانجليزي من زمان وكان الرياضيات أزمة عندي. كنت اذاكر يوميا اقل شي ٤ ساعات مكثفة وركزت على الفهم اكثر من حل الاسئلة و التجميعات.

قبل الاختبار بأسبوع ركزت جدا على الدراسة و كنت مخلصة كل الدروس و ركزت على التجميعات و دورت اسئلة لكل درس واجهت فيه صعوبة.

وطلع قبولي ولله الحمد في طريقي لاختبار التحصيلي الاول و كانت لحظه فرحة و فخر خصوصا ان التحصيلي كان مسبب لي توتر.

و بذلك وصلت للنقطة اللي كنت اطمح لها من بداية الثانوي، وقدرت بقدرة الله اني أحقق حلمي في الابتعاث و الدراسة في خارج المملكة.

الطريق ما كان سهل أبدا، لكن النجاح الحقيقي أبدا ما يتحقق بدون تعب والله يوفقكم جميعا. أنا أشكرك على دورتك لان بفضل الله ثم دورتك ما كان انقبلت.